ՄՐՑՈՒՅԹԻ ՀԱՅՏԱՐԱՐՈՒԹՅՈՒՆ
Քաղաքականության կրթաթոշակներ ծրագիր 2017
ԲՀՀ-Հայաստանը հայտարարում է «Քաղաքականության կրթաթոշակներ» ծրագրի շրջանակներում մրցույթի մասին, որն ուղղված է աջակցելու կրտսեր և ավագ հետազոտողներին՝ ովքեր պատրաստակամ են իրականացնել լայնածավալ և առաջադեմ ուսումնասիրություններ` հանրային քաղաքականության տարբեր բնագավառներում բացահայտելու բաց հասարակության առջև ծառացած առավել հրատապ մարտահրավերները և մշակել կիրառական լուծումներ: Դիմորդները կարող են հետազոտական հայտեր ներկայացնել Հայաստանում հանրային քաղաքականությանն առնչվող, ինչպես նաև բաց հասարակության ձևավորման համատեքստում ծագող ցանկացած հրատապ թեմայով:
Ով կարող է դիմել
Ծրագիրը բաց է քաղաքացիական հասարակության ներկայացուցիչների, համալսարանների դասախոսների, հանրային քաղաքականության ոլորտի հետազոտողների, վերլուծաբանների, փորձագետների և խորհրդատուների համար: Անհրաժեշտ է ունենալ նվազագույնը մագիստրոսական կրթություն հանրային կառավարման, քաղաքականության, քաղաքագիտության կամ սոցիալական այլ գիտությունների` իրավագիտության, տնտեսագիտության, միջազգային հարաբերությունների կամ համանման բնագավառներում: Հանրային քաղաքականության վերլուծության, ինչպես նաև շահերի պաշտպանություն իրականացնելու փորձի առկայությունը ցանկալի է, հետազոտական աշխատանքների համար անհրաժեշտ գրավոր հմտությունների առկայությունը` խիստ գերադասելի: Դիմորդները պարտավոր են էական/անհրաժեշտ ժամանակ հատկացնել առավելագույնը հինգ ամիս տևող նախագծերի իրականացմանը: Դիմում-հայտերը ընդունվում են միայն անհատների կողմից:
Ակնկալվող արդյունքներ
Դիմորդներից ակնկալվում է Հայաստանի առջև ծառացած մարտահրավերների1 շրջանակում կոնկրետ խնդիրների բացահայտում և ձևակերպում, քաղաքականության հետազոտության իրականացում և հանրային դիսկուրսի խթանում` հանրային կյանքի տարբեր ոլորտների քաղաքականության խնդիրները/մտահոգությունները լսելի դարձնելով և դրանց համար լուծումներ առաջարկելով: Կրթաթոշակառուներից ակնկալվում է փաստարկների վրա հիմնված խնդիրների և բարեփոխումների հարցադրումներ ձևակերպել` կիրառել համապատասխան մեթոդաբանական գործիքներ և հետազոտության վրա հիմնված ապացույցներով եզրակացություններ ձևակերպել: Կրթաթոշակառուները պետք է ներկայացնեն կառուցվածքային հաշվետվություն` քաղաքականության վերլուծության (10,000 բառի սահմաններում) և հակիրճ առաջարկություններով քաղաքականության վերլուծության համառոտագիր (policy brief): Հանրային դիսկուրսի խթանումը կարևորվում է որոշումների կայացման գործընթացների վրա արդյունավետ ազդեցություն ունենալով: Կրթաթոշակառուներից ակնկալվում է ժամանակի տրամադրում` իրենց հետազոտությունը ճանաչելի դարձնելու նպատակով: Ցանկալի է, որ կրթաթոշակառուները կազմեն և հետևեն քաղաքականության խնդիրը/մտահոգությունը ճանաչելի դարձնելու ռազմավարություն, որը կներառի հանդիպումներ և քննարկումներ համապատասխան ոլորտի պատասխանատուների, որոշում կայացնողների, խմբերի և դաշնակիցների հետ, հանրային քննարկումների նախաձեռնում և մասնակցություն, հանրային հաղորդակցման տարբեր ձևաչափերում նեգրավում` տվյալ քաղաքականության խնդրի վերաբերյալ տեղեկացված լինելու միտումով:
Դիմումների ներկայացում
Հետաքրքրված անձիք պետք է ներկայացնեն առաջարկվող ծրագրի լրացված դիմում-հայտի ձևը, ինքնակենսագրություն (CV) և նախորդ հետազոտական աշխատանքի նմուշ հետևյալ էլ. փոստի հասցեին՝ register@osi.am մինչև ս. թ. հոկտեմբերի 25-ը, ժամը 17.00: Դիմումների էլեկտրոնային տեսքով ներկայացումը պարտադիր է: Դիմումը մեզ ուղարկելուց հետո, մինչև երկու աշխատանքային օրերի ընթացքում դիմորդները կստանան հաստատող նամակ դիմումի ստացման վերաբերյալ, իսկ այն չստանալու դեպքում, խնդրում ենք կապ հաստատել մեզ հետ:
Դիմումների տպած օրինակները նույնպես ընդունվում են (ցանկության դեպքում)` Թումանյան 7/1, 2-րդ փակուղի հասցեով: Հարցերի և լրացուցիչ տեղեկությունների համար կարող եք դիմել Քաղաքականության կրթաթոշակներ ծրագրի պատասխանատու Վալենտինա Գևորգյանին՝ հեռ. 53-38-62, 53-67-58 կամ էլ.հասցե` valentina@osi.am
Մրցույթի հետ կապված հարցերի պարզաբանմանը նվիրված հանդիպումը տեղի կունենա սույն թվականի հոկտեմբերի 12–ին, Գոլդեն Թուլիփ հյուրանոցի Վիվալդի սրահում, ժամը 17.00
Դիմումների գործընթացի վերաբերյալ հարցերի դեպքում դիմել հետևյալ էլ. հասցեով՝ valentina@osi.am