«ԿԱԶԱ» հիմնադրամը վերսկսում է անվճար մասնագիտական դասընթացներ կազմակերպել Հայաստանից 3 և ավելի ամիս բացակայած և վերջին 1 տարում հետ վերադարձած ՀՀ քաղաքացիների համար: Դասընթացներն իրականացվում են «Թիրախային նախաձեռնություն Հայաստանի համար» ծրագրի ֆինանսավորմամբ։
Մի քանի տարի շարունակ գտնվելով հայրենիքից դուրս՝ հայրենիք վերադարձողները հայտնվում են իրենց համար խիստ փոփոխված, գրեթե անճանաչելի մթնոլորտում: Որպես կանոն՝ նրանցից շատերը տարիների ընթացքում կորցրած են լինում նաև իրենց կապերը: Վերադարձի գործընթացը դյուրին չէ, և այն հաճախ ուղեկցվում է սթրեսներով: Այս ամենի պատճառով վերադարձողները դարձյալ ձգտում են լքել հայրենիքը, և այդ ցանկությունը այնքան մեծ է լինում, որ խտրականություն չի դրվում անգամ միջոցների ընտրության հարցում: Որպեսզի կանխվեն նման իրավիճակները, պետք է վերադարձից հետո լինել նրանց կողքին:
Հայաստանից ցանկացած երկիր մեկնած միգրանտները, ովքեր այնտեղ են եղել 3 և ավելի ամիս և հայրենիք են վերադարձել վերջին 1 տարում, կարող են դիմել «ԿԱԶԱ » հիմնադրամ և ԱՆՎՃԱՐ հիմունքներով մասնակցել մինչև 4 ամիս տևողությամբ իրենց իսկ նախընտրությամբ տարբեր դասընթացների (Օրինակ՝ զբոսավարություն, ծրագրավորման տարբեր դասընթացներ, վարսավիրություն, մատնահարդարում և այլն): Ձեռքբերված գիտելիքներն ու հմտությունները նրանց հնարավորություն կընձեռեն հաջող կերպով վերաինտեգրվել աշխատաշուկա:
Մանրամասների և հարցերի համար կարող եք զանգահարել 010 54 18 44, 093 45 09 15 կամ այցելել մեզ Նալբանդյան 29 հասցեով ժ.10:00-19:00:
Ծրագրի մասնակիցների մասին կարող եք կարդալ այստեղ՝
https://www.facebook.com/Espaces/posts/10153279655363113
facebook.com/Espaces/photos/pb.184441598112.-2207520000.1441197898./10153170519643113
«Թիրախային նախաձեռնություն Հայաստանի համար» ծրագիրը ԵՄ-ի և Հայաստանի միջև գործող «Շարժունակության համագործակցության առաջնային ծրագրերից» է: Ծրագրի նպատակն է Հայաստանում ամրապնդել միգրացիայի կառավարման կարողությունները՝ հատուկ կենտրոնանալով վերաինտեգրման միջոցառումների վրա: Այս ծրագիրն իրականացվում է ԵՄ ութ անդամների կոնսորցիումի կողմից, որը գլխավորում է Ֆրանսիայի ներգաղթի և ինտեգրացիայի գրասենյակը։