Հինգշաբթի, փետրվարի 7-ին ժամը 18:15-ին բոլոր լրատվամիջոցները, ինչպես նաև բոլոր հետաքրքրված անձիք հրավիրվում են Հայաստանի ամերիկյան համալսարանի (ՀԱՀ) Մանուգեան սրահ , Բաղրամյան 40, ուր Բաց դռների օրվա շրջանակներում նորանշանակ դեկանի պաշտոնակատար`Կալիֆորնիայի համալսարանի Մերջ կառավարման դպրոցի նախկին դեկան և պատվավոր պրոֆեսոր Դեյվիդ Հ. Բլեյքի, կենտրոնական բանկի և Ֆինանսների նախարարության ներկայացուցիչների, ինչպես նաև համալսարանի փոխնախագահների, պրովոստի և նախագահի մասնակցությամբ կներկայացվի Հայաստանի ամերիկյան համալսարանի գործարար կառավարման և տնտեսագիտության ֆակուլտետի նոր` տնտեսագիտության մագիստրոսի կոչում շնորհող ծրագիրը:
Մագիստրոսի կոչում շնորհող այս ծրագիրը ՀԱՀ- առաջարկում է առաջին անգամ: Դասընթացների որոշ մաս կանցկացվի ԿԲ -ի Դիլիջանի ուսումնահետազոտական կենտրոնում: Ծրագրում ներգրավված կլինեն միջազգային համբավ ունեցող լավագույն դասախոսներ:
Համալսարանն առաջարկում է նաև ֆինանսական օժանդակության ծրագրեր (կարիքի վրա հիմնված), որոնց համաձայն` ուսանողները կարող են ստանալ դրամաշնորհ, որը կկազմի ուսման վարձի մինչեւ 90 տոկոսը, ինչպես նաև առաջարկվում է ուսման վարձի աստիճանաբար վճարման համակարգ ևկրթաթոշակներ:
Ծրագրի նորընտիր դեկանի պաշտոնակատար պրոֆեսոր Բլեյքը Գործարարության ու տնտեսագիտության ֆակուլտետի ղեկավարությունը ստանձնում է գիտական մեծ փորձառությամբ և դեկանի պաշտոնում կառավարման 22 տարվա մեծ փորձով: Նա երկու տասնամյակից ավել փորձառություն ունի որպես դեկան Նորսիսթերն, Ռութգերս, Հարավային Մեթոդիսթ և բոլորովին վերջերս Կալիֆորնիայի, Իրվին համալսարաններում: Ավելի քան 16 hասարակական և մասնավոր ընկերություններում և մի շարք շահույթ չհետապնդող կազմակերպություններում եղել է խորհրդական և խորհրդի անդամ:
Հայաստանի ամերիկյան համալսարանը (ՀԱՀ) մասնավոր, անկախ համալսարան է Երևանում՝ Հայաստանում: Հիմնադրված լինելով 1991 թվականին՝ ՀԱՀ-ը հանդիսանում է Կալիֆորնիայի համալսարանի համագործակիցը : Ուսուցման, հետազոտության և հանրային ծառայությունների միջոցով ՀԱՀ-ը ծառայում է Հայաստանին և տարածաշրջանին՝ յոթ տարբեր հիմնական բնագավառներում բարձրորակ կրթություն մատակարարելու միջոցով՝ խրախուսելով քաղաքացիական ներգրավվածությունը և խթանելով ժողովրդավարական արժեքները: