Հայաստանում կազմակերպվող երիտասարդական, ոչ երիտասարդական, միջազգային և տեղական գիտաժողովների մասին հայտարարությունները հրապարակվում են տվյալ հաստատության կայքէջում, լրատվամիջոցներում, սոցիալական կայքերում և շատ հաճախ Արմակադում: Այդ հայտարարությունները պետք է դիմողներին մանրամասն ներկայացնեն, թե ինչի մասին է լինելու տվյալ գիտաժողովը:
Հաճախ գիտաժողովների հայտարարությունները շեղվում են կանոններից ու չեն ներկայացնում, թե ինչի մասին է այդ գիտաժողովը: Սրա փոխարեն տեքստը լցնում են այնպիսի անպիտան կետերով ինչպիսիք են ներկայացվող հոդվածի միջտողային հեռավորությունները, տառաչափը և այլն, ինչպես նաև ներկայացվում են տվյալ գիտաժողովի կազմակերպչական աշխատանքների հետ կապ չունեցող տասնյակ մարդկանց անուններ՝ իբրև կազմակերպող կոմիտեի անդամներ:
Որպեսզի գիտաժողովի մասին հայտարարությունը լինի հնարավորինս ներկայացուցչական, այն պետք է մանրամասն պատմի գիտաժողովի թեմատիկ ընդգրկումի մասին ու մանրամասներ ներկայացնի, թե ինչ ուղղվածության գիտնականների դիմումներ ու ելույթներ են ակնկալվում:
Բոլոր փորձառու ու սկսնակ գիտաժողով կազմակերպողներին, ինչպես նաև նման փորձ չունեցողներին, սակայն ցանկություն ունեցողներին հրավիրում ենք մասնակցելու 30-60 րոպե տևողությամբ դասընթացի այն մասին, թե ինչպես է պետք գրել ակադեմիական տեքստ գիտաժողովի կազմակերպման մասին:
Դասընթացը կվարի ԱՐՄԱԿԱԴի նախագահ Խաչիկ Գևորգյանը։
Դասընթացի օրի, ժամի ու վայրի մասին կտեղեկացվեն գրանցված մասնակիցները։
Մասնակիցների թիվը խիստ սահմանափակ է՝ 5 հոգի։
Դասընթացն անվճար է։
Եթե ուզում եք մասնակցել այս դասընթացին, ապա խնդրում ենք մինչև մարտի 12-ը news@armacad.info հասցեին ուղարկել նամակ այն մասին, թե ինչու եք ուզում մասնակցել այս դասընթացին։ Նամակին խնդրում ենք կցել ձեր CV-ն, որի մեջ անպայման պետք է նշված լինի հետադարձ կապի համար անհրաժեշտ հեռախոսահամար։ Նամակն անպայման պետք է վերնագրել «Գիտաժողովի հայտարարություն», հակառակ պարագայում ձեր նամակը կկորի բազմաթիվ այլ նամակների շարքում: