Join ARMACAD today

Join over 40,000 researchers and students.

Subscribe and get new academic opportunities every week.

EdX – առցանց կրթության նոր հնարավորություններ

Save in my favorites

  EdX կայքի առաքելությունը բարձրակարգ կրթության ապահովումն է ամենքին և ամենուր՝ անկախ սեռից, եկամտից կամ սոցիալական կարգավիճակից։ 

EdX-ը ոչ առևտրային կազմակերպություն է, որը հիմնադրվել է Հարվարդի Համալսարանի և Մասաչուսեթսի Տեխնոլոգիայիական Ինստիտուտի կողմից՝ նպատակ ունենալով ստեղծել ինտերակտիվ ուսուցում համացանցի միջոցով։ Հիմնադիրները ստեղծել են հոյակապ առցանց հարթակ` առաջարկելով խորությամբ ուսումնասիրված թեմաներով բարձր որակի առցանց դասընթացներ ինչպես համալսարանականների, այնպես էլ ամբողջ աշխարհի մարդկանց համար։ Այժմ edX-ի կայքում հնարավոր է մասնակցել աշխարհի լավագույն տասներկու համալսարանների կողմից կազմակերպված անվճար դասընթացների։ Այդ համալսարաններից են Հարվարդը, Մասաչուսեթսի Տեխնոլոգիական Ինստիտուտը, Տորոնտոյի Համալսարանը, Ավստրալիայի Ազգային Համալսարանը, Կալիֆոռնիայի Համալսարանը և այլն։ Այս պահին առկա է քսանհինգ դասընթաց՝ հիմնականում տեխնիկական և բնական գիտությունների վերաբերյալ. դրանց թիվն աստիճանաբար ավելանում է։ Իսկ դասընթացի ավարտին տրվում է վկայական, որը  գրավիչ տող կլինի յուրաքանչյուրի ինքնակենսագրականի մեջ։

Հետաքրքրե՞ց: Ինչպե՞ս կարելի է միանալ: Դա շատ հեշտ է։

Դասընթացներին կարող է միանալ յուրաքանչյուրը, ով ունի ցանկություն և ինտերնետից օգտվելու հնարավորություն։ Կայքում գրանցվելը անվճար է, շատ հեշտ և արագ. պարզապես պետք է լրացնել մի քանի անհրաժեշտ տվյալներ և հաստատել գրանցումը։ Այնուհետև գտնելով այն դասընթացը, որին ցանկանում եք մասնակցել՝ գրանցվել և սպասել մինչև դասախոսությունների սկիզբը։ Քանի որ դասընթացներին մասնակցում են մեծ թվով ուսանողներ, դասախոսները չեն կարող անհատական մոտեցում ցուցաբերել յուրաքանչյուրին, հետևաբար դասընթացի կառուցվածքը, դասախոսության նյութը, մատուցման ձևը և ուսանողների պատրաստակամությունը շատ կարևոր է։ Դասախոսությունները հնարավորինս պարզ և ըմբռնելի են ներկայացվում ։ Ուսանողներին պարզապես մնում է հետևել դասախոսություններին, որոնցից յուրաքանչյուրը տևում է մոտ տասը րոպե, անել գրառումներ և կատարել առաջադրանքները։ Տրվում են նաև նյութեր լրացուցիչ ընթերցանության համար: Վերջում պետք է հանձնել քննութուն։ Ուսանողները կարող են մասնակցել առցանց քննարկումների իրենց «դասընկերների» հետ, կամ էլ կազմել խմբեր՝ ներգրավելով նաև համաքաղաքացի ընկերներին ։ Դա կօգնի պատրաստվել քննություններին, որոնք հաջողությամբ հանձնելուց հետո կտրվի վկայական։

Ինչպես ուսանողներն, այնպես էլ համալսարանները կօգտագործեն edX-ը՝ որպեսզի պատկերացում ունենան ուսանողների առցանց ուսուցման և համաշխարհային կրթական մակարդակի տեխնոլոգիական վերափոխման մասին: Այսպիսով, EdX-ի նպատակն է միավորել տարբեր տարիքի և ազգության ուսանողների, որոնք այլապես իրար հետ շփվելու և սովորելու հնարավորություն չէին ունենա: Սա մի նոր ալիք է կրթության ոլորտում, որը հնարավորություն է տալիս ծանոթանալ նյութերի, որոնք հասանելի չեն ամենքին, ու առաջարկում  լավագույն դասընթացները և լավագույն ուսուցիչներին։

«Առցանց ուսուցումը, իհարկե, նորություն չէ։ Տարբերությունը առաջնորդների կողմից կիրառվող տեխնոլոգիայի մասշտաբների մեջ է, որոնք համատեղում են մեծ նպատակները ոչ ծախսատար ինտերնետի բիզնես մոդելների հետ»,-  MIT տեխնոլոգիայի գրախոսություն։

Ըստ Անանտ Ագարվալի՝ edX-ի նպատակը «բարձրորակ ուսուցումն» է երկու մակարդակով. «Առավել հասանելի դարձնել կրթությունն ամբողջ աշխարհի ուսանողների համար ՝ընդ որում  փոխակերպելով նաև համալսարանական ուսուցումը»։ Այս խառը մոդելը հնարավորություն կտա բարելավելու թե վիրտուալ և թե սովորական դասընթացները։ Հարվարդի անձնակազմը կարող է վերահսկել այս մոդելը, քանի որ edX-ի վարչությունը կազմված է ինչպես ակադեմիկոսներից, այնպես էլ կառավարիչներից։ Ոչ առևտրային կազմակերպություն լինելով հանդերձ՝ կարելի է ասել, որ edX-ը ավելի շատ սկսնակ ընկերություն է, քան ակադեմիական բաժին։ Դրա գրասենյակները գտվում են ոչ թե MIT-ի մոտ, այլ տարբեր տեխնոլոգիական ընկերությունների և նոր ձեռնարկությունների շրջակայքում։ Հիմնադրվելուց ի վեր այն արագորեն զարգանում է և գրավում նոր մարդկանց։ Անձնակազմը «Վեց ամսվա ընթացքում զրոյից հասել է վաթսունի »,- ասել է տնօրենը։  (Հարվարդի պարբերական)

Աշխարհի շուրջ 192 երկրներում անընդհատ ավելանում է ուսանողների բարձրորակ ուսուցում ստանալու պահանջարկը, և մարդիկ որոշում են մասնակցել edX-ի այս կամ այն դասընթացին։ Այսպիսով, գործունեության ընդլայմանը զուգընթաց, ընկերությունը փնտրում է տաղանդավոր և եռանդուն մարդկանց, ովքեր ունեն նոր գաղափարներ՝ իրենց թիմին միանալու համար։ Ընկերությունը ցանկանում է ստեղծել մի միջավայր, որն աջակցող է, տարբերվող և հետաքրքիր, ինչպիսին որ բրենդն է։ Եվ այսպես՝  edX-ը նաև առաջարկում է ձեռք բերել հիանալի աշխատանքային փորձ՝ միանալով թիմի, որի յուրաքանչյուր անդամ մտահոգվում է և ցանկանում փոխել աշխարհը:

Ամփոփելով՝ կրկին նշեմ, որ առցանց դասընթացների մասնակցող ուսանողների թիվը գնալով ավելանում է։ EdX-ի նպատակն է դասընթացներում ներգրավված ուսանողների թիվը հասցնել միլիարդի:

Նյութը պատրաստեց Գրետա Ավետյանը

Այս նյութն արտատպելիս ակտիվ հղումը www.armacad.info-ին պարտադիր է: 

Subscribe to our newsletter

and receive information about international academic and professional opportunities

scholarships, summer schools, conferences, grants, fellowships, trainings